Ում և ինչի համար են նախատեսված օժանդակ միջոցները:
Եթե հաշմանդամության պատճառով տանն օգնում են Ձեզ առօրյա գործերում, ապա դրա անհրաժեշտությունը կունենաք նաև նորածին երեխային խնամելիս: Նորածնին պետք է հաճախակի կերակրել և փոխել հագուստը, հնարավոր է նաև գիշերվա ընթացքում: Խնամքը հաշմանդամություն ունեցող մայրիկների և/կամ ծնողների, խնամակալների դեպքում ավելի դյուրին դարձնելու համար մեր կազմակերպությունը ստեղծել է օժանդակ միջոցների շրջանառու հիմնադրամ:
Ձեռաբերման պայմանները:
Ցանկացողները կարող են ծանոթանալ այս պահին կազմակերպության տնօրինության տակ գտնվող միջոցների ցանկին /տես ստորև/ և վարձակալել սարքերը՝ նախապես կնքելով վարձակալության պայմանագիր և վճարելով վարձակալության համար նախատեսված գումարը:
Վարձակալությունը հնարավորություն է տալիս արագ ձեռք բերել աջակցող միջոցն ու այն գործածել այնքան ժամանակ, որքան անհրաժեշտ է երեխայի զարգացման տվյալ փուլում պատշաճ խնամքը մայրիկի համար հարմարավետ դարձնելու համար: Վարձակալությունը նաև թույլ է տալիս սարքը վերադարձնել կենտրոնին՝ հետագայում մյուս ծնողներին ըստ անհրաժեշտության փոխանցելու համար: Այն խնայում է թե ձեր միջոցները, թե երկարացնում է սարքի նպատակային գործածության կյանքը: Շրջանառու հիմնադրամի միջոցով կենտրոնը նպատակ ունի օգտակար միջոցները դարձնել հասանելի ու ավելի մատչելի հաշմանդամություն ունեցող ծնողներին:
Վարձակալությանը զուգահեռ կենտրոնը նաև խնդիր է դրել աջակցող միջոցները հասանելի դարձնել դրանք գնելու միջոցով: Այն ընտանիքները, որոնք կցանկանան գնել աջակցող միջոցները, կենտրոնը նախապես հաստատված գնացուցակի հիման վրա կկազմակերպի դրանց գնումն ու առաքումը՝ ազատելով ծնողներին ավելորդ հոգսից ու խնայելով վերջիններիս ժամանակը:
Աջակցող միջոցների արժեքները ներկայացված են միջինացված գներով՝ պայմանավորված փոխարժեքի տատանմամբ և առաքող ընկերությունների կողմից ծառայության սակագների փոփոխությամբ:
Վարձակալման արժեքը միջինացված է: Վարձակալության ժամանակ կա տարբերակում: Առաջին անգամ օգտվողները վճարում եմ միջին արժեքից ավելի մեծ գումար, իսկ հաջորդող վարձակալների համար գումարը նվազում է՝ հաշվի առնելով մաշվածությունը: