Ի՞նչ է անկախ կյանքը, ինչպիսի՞ ռեսուրսներ, հմտություններ և հնարավորություններ են հարկավոր հաշմանդամություն ունեցող անձանց անկախ կյանքով ապրելու համար, ինչպիսի՞ առաքելությամբ և տեսլականով պետք է առաջնորդվի անկախ կյանքի ռեսուրս կենտրոնը և ի՞նչ ծառfայություններ պետք է այն մատուցի:
Այս և այլ հարցեր քննարկվեցին գործընկեր Մոբիլիթի Ինթերնեյշնլ ԱՄՆ կազմակերպության և ԱՄՆ-ի անկախ կյանքի առաջատար փորձագետների՝ Կալիֆորնիայի անկախ կյանքի կենտրոնների հիմնադրամի գործադիր տնօրեն Քրիստինա Միլզի և Ability360 կազմակերպության համայնքային ներառման հարցերով փոխնախագահ Դարել Քրիստենսոնի հետ առցանց խորհրդատվությունների ընթացքում:
Ինչպես ավելի վաղ հայտնել էինք, «Դեպի անկախ կյանք» ծրագրի շրջանակներում առաջիկայում Գյումրիում կբացվի անկախ կյանքի ռեսուրս կենտրոն (ԱԿՌԿ): Շաբաթական մեկ անգամ անցկացվող առցանց խորհրդատվությունների ընթացքում ԱՄՆ անկախ կյանքի փորձագետները «Ագաթ» ՀԿ-ի աշխատակազմի հետ կիսվեցին իրենց փորձով և արդյունավետ գործող ԱԿՌԿ ստեղծելու վերաբերյալ իրենց խորհուրդներով: Դրանք ընդգրկում են առաջարկություններ և ռազմավարություններ՝ ուղղված հաշմանդամության տարբեր խմբերի անձանց մատչելի ծառայությունների մատուցմանը, ինչպես նաև անկախ կյանքով ապրելու համար անհրաժեշտ գիտելիքներ և հմտություններ փոխանցելու միջոցով նրանց հզորացնելուն:
Անկախ կյանքի ամերիկացի փորձագետների և Մոբիլիթի Ինթերնեյշնլ ԱՄՆ կազմակերպության թիմի հետ առցանց քննարկումների արդյունքում «Ագաթ» ՀԿ-ի թիմը մշակեց Գյումրիի անկախ կյանքի ռեսուրս կենտրոնի առաքելությունը և տեսլականը, ինչպես նաև այն հիմնական ծառայությունների ցանկը, որոնք տրամադրվելու են կենտրոնի շահառուներին: